شخصيتك من قرمطة الغضاريف

Posted: مايو 24, 2009 in فلسفات عميقة .., إلى من يهمه الأمر .., تحية مسائية ..
الوسوم:

تحليل الشخصية

هذا إختبار يكشف شخصيتك من أجزاء الدجاجة إللي تفضل تاكلها ،، راح نبدأ من الرقبة ..

1- إللي يحب ياكل الرقبة .. هذا غالبا لسانة طويل وملاحق وغريب الأطوار وله تصانيف غريبة في بعض الأحيان مالها أي تفسير ومرتاب عيونة زي الرادار ما تثبت تجيب الصداع للي يركز فيها ، ياكل أظافره و مرتبك وفي أحيان يتهم إللي قدامه إنه سبه ويتحرش فيه .

2- إللي يحب ياكل الصدر .. هذا غالبا دب وهرجة كثيييير لدرجة الملل وراسه يابس وناشف بس وقت الروقان طيبوب وحبوب ، آراءه غالباً صائبة وسديدة ويستشيروه إللي حواليه يحب الطبخ وشاطر في عمل المندي الطايفي .

3- إللي يحب ياكل الأجنحة .. هذا لعنة يا كافي ويحب الوحدة زي الشيطان ، بس عنده حس فني راقي ولديه ميل للموسيقى والرسم والأعمال الفنية المبدعة ويخترع برامج الكمبيوتر المفيدة ونلاقية ناشف حاشف جلد على عضم من كثر ما يحرق في نفسه .

4- إللي يحب ياكل الفخد .. هذا إجتماعي بامتياز وخدوووووووم لين تتعب ما يعرف يقول لا ، بس مع أهل بيته يومه بألف وستمية سنه كل أموره هزليه ما يعرف الجدية في الحياة بس نغفر خطاياه لأنه طيب ويحب الأفلام الكوميدية إللي ما تقعد عنده بس يوزعها .

5- إللي يحب ياكل الساق .. يا حليله يحب تصليح الأعطال المنزلية والشارعية وسيارته وسيارة جيرانه وممكن يعدي على دراجة الباكستاني ويصلحها ما عنده مشكلة لمن يركز في شيء ما يدري  وين ربي حاطه حواجبه غالبا مقرونة .

6- إللي يحب يقرمط الغضاريف .. هذا هايف ومضيع طاسته مأجر راسة أول من يقعد على السفرة وآخر من يقوم عليها ويافيه لكاعة بس الحلو فيه حاله من حال نفسه لا يهش ولا ينش دائما مضيع أغراضة وشباشبه “و إنتم بكرامه” تنسرق من عند المسجد .

7- إللي يحب يمشمش العضم .. هذا تلاقي وجهه مفقع ، العتله في يده عربجي يتلفت و يضارب خياله على باله إنسان ثاني حتى أكل الجن ما سابه يتلذذ في أكل العضم يهيأله يكسر عظام آدمي  سنه الأمامي مكسور ويضحك بفخر مبسوط بشنبه المحروق .

صدقتوا هذا التحليل ؟ تراه من راسي يعني تأليف بعيد عن الصحة

حلوة2

من كثر ما أقرأ من تحليل شخصية ألاقيها في مواقع منوعة وتجيني على الإيميل و إلا إختبارات الفيس بوك بالذات إللي ما أدري إش يبغوا ، قلت خليني أقلدهم ومالوا كلنا بنهيص أفتكر مرة جاني على الإيميل تحليل شخصية من فاكهتك المفضلة .. النتيجة اللي ياكل التفاح يحب التفاح وإللي ياكل الموز يحب الموز وإللي ياكل البطيخ يحب الفسيخ .. وإنتم ماشيين مصاخة وفضاااوة .. وإلا شخصيتك سيدتي من شباصتك وش ذا الهياط .

خلينا منهم ، جبتلكم تحليل شخصية قيم و ممتاز بمعنى الكلمة ومبني على دراسة علمية ، دقيق في التحليل لأبعد درجة كلمة رائع قليلة فيه للمستشار سلمان بن عبيد الشمراني ورسالته هي مساعدة الآخرين على اكتشاف أنفسهم وتفجير طاقاتهم الخفية وتعزيز قدراتهم الجلية لتحقيق الاستقرار النفسي والتميز المعرفي والاكتفاء المالي والاستفادة من ثورة الاتصالات وتقنية المعلومات والإنترنت في ذلك …

← الإختبار هون

و بالتوفيق

ليلى . ق

Advertisements
تعليقات
  1. حلمي معي كتب:

    ابي اتذكر اانا ايش اكل بالضبط من الدجاجه
    ما اذكر ما يهمني اي جزء من الدجاجه اكله
    واحس التحليل مو دقيق مره

    ومشكوره على تقديم تحليل المستشار

    تحياتي

  2. ليلى.ق كتب:

    حلمي معي ..
    كتبت نهاية التحليل .. “صدقتوا هذا التحليل ؟ تراه من راسي .”
    المهم أن تستفيدي من تحليل المستشار 🙂

  3. يا أخيتي …

    الانسان اذا اراد ان يصرف … فانه يستتر

    مو عيني عينك تطلع النتائج خطأ

    لك مستقبل الظاهر في اختبارات الفيس بوك اللي فاحت وبارت

    أمتعتنا جدا بنصك 🙂

    تحيتي لك

    • ليلى.ق كتب:

      صارخ بصمت ..
      ما فهمت قصدك ،،
      على العموم الإختبار الذي وضعتة تقليد للاخبارات التي ليس لها طعم ولا مصداقية ..
      واختبارات الفيس بوك لا تخصني لأني مجرد زائرة لها .
      أهم شيء إنك استمتعت .. لأن القصد منها الفرفشة والفائدة 🙂

  4. أحمد عبدالله كتب:

    هلا ليلي,

    احلى يوم تفتح الصفحة وتشوف هالملاك الطاهر ( الله يرزقك ببنت احلى منها ) وبصراحة هي احلى من التاج.

    بالنسبة ( البوست ) التحليل فانا يوم بديت اقرا عرفت انه مقلب من مقالبك وترى ما ادري عن غيري بس صرت من كثر ما اقر لك عرفت متى يكون البوست جد ومتى يكون مقلب مثل مقلب ان المملكة منعت الحج عن حجاج الخارج الي شربته يعني بلاش هالحركات علينا ( امزح ).

    بس بصراح مسكين الي يصدق تحليلك والذات إللي يحب يمشمش العضم لاني بصراحه واحد منهم ههههههههههههههههههههههه

    والحين جد

    بالنسبة للتحليل انا ما اهتم لاني صرت اعرف قدر نفسي جيدا.
    ( رحم الله عبداً عرف قدر نفسة )

    وبعدين حبيت استطلع على الدكتور المذكور انفا حسيت انه ما خذ الموضوع تجاري بحيث ان سعر الاختبار ( التحليل ) 9 دولار ( الظاهر انه يجلس مع لبنانين ) لا والعرض الحين مجانا
    عشان كذا ما تحمست لو انه حط مثالا تحليل الشخصية بفلوس وتحصل ( مقياس الذكاء والقدرات الذاتية او مقياس طرق التواصل ) كنت تحمست او الكتاب الي صدر للدكتور كيف تعرف شخصيتك

    ما ادري احس انه الدكتور متأثر بفيلم المشخصاتي هههههههه

    على العموم افكر كيف استفيد من موقع الدكتور لانه فيه اشيا شدتني وبعدي يمكن ازور المركز تراه فيه جدة كلها كم شارع مع كم حفره واشارة حوصل هههههههههههه

    مشكور على البوست ومشكورة على الموقع

    تحياتي لك
    ودمتي بخير
    أحمد عبدالله

  5. هناك على الشبكة الكثير ومنه الغث ومنه الثمين

  6. هههههههه يا ليالي سويتها فيا مرة ما رح تسويها مرة ثانية بس من البداية عرفت انه مقلب.
    يعني من مقلب الحجاج الي كنت فيه انا والوالد ضحية لك من يومها تعلمت.
    بس الله يقطع شيطانك شي مرة مضحك خصوصا الي يحب ياكل الفخد لاني انا منهم.
    انا زرت الموقع لكن الرجال يبغى فلوس في اختبار واحد فقط مجاني.
    دمتي بصحة وعافية لتعملي لنا مقالب فل من مقالبك.

  7. ليلى.ق كتب:

    أحمد عبدالله ..
    هههههه اللهم آمين ، بالنسبة للدكتور ما عليا منه ومن مصلحته المهم الاختبار المجاني رائع وحبيت أفيد من يريد الإفادة وفي ناس ما تفرق معاها تشتري الاختبار .. والموقع في مواضيع قيمة لو ما تبغى الاختبار 🙂

    .
    محمد الجرايحي ..
    على قولتك المهم ما نصدق أي اختبار ..
    حياك الله .

    .
    Entropy ..
    مرورك الأجمل 🙂 .

    .
    ملح الحياة ..
    خسارة كان ودي تشربي المقلب 😀
    جربي الاختبار المجاني ،، واستفيدي من باقي مواضيع الموقع لأنها مفيدة ..
    منورانا يا عسل .

  8. نوفل كتب:

    انا اكل الفخد..لكن تراني حسب تحليلك اكل الأجنحة و أنا ما أدري
    مع تحياتي

  9. شخص كتب:

    سقط في يدي كتاب من هذا النوع جعلني شمالي جنوبي .. المهم أنه قسمني مثل تقسيمك

    للدجاجة ..

  10. ليلى.ق كتب:

    نوفل ..
    ههههههههه ترا التحليل تأليف يا نوفل 🙂

    .
    شخص ..
    🙂 ، في كتاب أسهل وأمتع وأكثر فائدة و وضوح من إللي تقصدة أنصحك تشتريه اسمه ” التواصل رغم اختلافاتنا ” سوزان ديلينجر .

  11. koreanarab كتب:

    وجدت اساءه كبيرة اتجاه من يأكل الصدر .. خخخخ

    بصراحة كنت اقرأ واضحك .. يعطيك العافية ..

    وعلى قولتك الحاجات هذي الايام كثرت والناس يعملون لهم تحليل خاص فليش حنا مانسوي خخخ

    دمتي بود

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s